2023 с. ахсынньы 14 күнүгэр АНА СС Гуманитарнай чинчийии уонна хотугу а5ыйах ахсааннаах омуктар проблемаларын институтун АФ уонна СӨ билимин үтүөлээх диэйэтэлэ, СӨ НА дьиҥнээх чилиэнэ, П.А. Ойуунускай аатынан Судаарыстыбаннай бириэмийэ лауреата, «Хотугу сулус» уордьан кавалера, ГЧуоХААОПИ саха тылын салаатын билим сүрүн үлэһитэ, ф.б.д., бэрэпиэссэр Петр Алексеевич Слепцов 95 сааһыгар анаммыт «Дьиссипилиинэлэр икки ардыларынааҕы дискурска Арассыыйа төрүт омуктарын тыллара» диэн ааттаах Бүтүн Арассыыйатааҕы билим-практическай кэмпириэнсийэ буолан ааста.
Бу кэмпириэнсийэҕэ Уфаттан АНА Уфатааҕы федеральнай чинчийэр киин Устуоруйа, тыл уонна литература институтун тыл үөрэҕин салаатын сэбиэдиссэйэ, ф.б.д. Гульназ Нурфаезовна Ягафарова уонна Москваттан АНА Тыл билимин Институтун Арассыыйа тылларын харайыыга, тилиннэриигэ уонна докумуоннарын оҥорууга Киинин билим сүрүн үлэһитэ, ф.б.д. Константин Юрьевич Замятин кэлэн тус бэйэлэринэн кыттыыны ыллылар. Кэмпириэнсийэни үөрүүлээхтик аһыыга ГЧуоХААОПИ дириэктэрэ уст.б.д. Сардана Ильинична Боякова Петр Алексеевич олоҕун устата дьарыктаммыт үлэтин суолтатын бэлиэтээн туран, үбүлээри эҕэрдэлээтэ, кэмпириэнсийэ үлэтигэр ситиһиилэри баҕарда. Тэрээһини дириэктэри билим үлэҕэ солбуйааччы, уст.б.х. Степан Григорьев салайан ыытта. Кэмпириэнсийэҕэ видео сибээһинэн Москваттан, Казантан, Иркутскайтан, Новосибирскайтан, Алматыттан, Уфаттан, Улан-Удэттан, Абакантан тиийэ кытыннылар, бэлиэ күнүнэн эҕэрдэлэрин тиэртилэр. 8 пленарнай дакылаат аа5ылынна (модератор – Институт саха тылын салаатын сэбиэдиссэйэ, билим сүрүн үлэһитэ, ф.б.д. Надежда Данилова). Күн иккис аҥаарыгар кэмпириэнсийэ 4 сиэксийэнэн арахсан үлэлээтэ.
Саха тылын салаатын билим аҕа үлэһитэ, филология билимин хандьытаата Егор Николаев эппитинэн, тыл туох төрүөттэн, туохха олоҕуран үөскүүрүн туһунан бэрт сэргэх кэпсэтии барда. Аныгы чинчийиилэри, кэлиҥҥи көрүүлэри билиһиннэриини тэҥэ тиэрмин боппуруоһа эмиэ үгүс ыйытыыны, сэҥээриини үөскэттэ. Холобур, Башкортостаҥҥа 80-90-с сыллартан тиэрмин хамыыһыйата тохтообокко үлэлии турар эбит. Өрөспүүбүлүкэ сүрүн хамыыһыйатыттан ураты, хас биирдии оройуон, бөдөҥ куораттар дьаһалталарыгар учууталлар, тыл үөрэхтээхтэрэ, суруналыыстар, суруйааччылар уо.д.а. кыттыылаах алын хамыыһыйалар бэрт айымньылаахтык үлэлииллэрин Г.Н. Ягафарова ирэ-хоро кэпсээтэ. Сэминээргэ кыттыбыт учуонайдар саҥа тыллары (тиэрминнэри) үөскэтии үлэтэ тыл бэйэтин ис кыаҕын туһанан (холобур, сыһыарыынан, түөлбэ тылыттан) барыахтааҕа ордук көдьүүстээҕин, туһалааҕын бэлиэтээтилэр. Г. Ягафарова 10 туомнаах баскыыр тылын быһаарыылаах тылдьытын «Саха тылын быһаарыылаах улахан тылдьытын» холобуругар оҥорбуттарын тоһоҕолоон эттэ. Сэминээр түмүгэр ыҥырыылаах ыалдьыппыт 15 туомнаах тылдьыты, 3 туомнаах Саха сирин устуоруйатын бэлэх тутта.
