2015 сылтан, сылын аайы «Дьокуускай куорат» КУо «Уокуруктааҕы норуот айымньытын киинэ» МБТ Дьокуускайдааҕы «Арчы Дьиэтэ» духуобунай култуура киинэ уонна Россия наукаларын академиятын Сибиирдээҕи салаатын Гуманитарнай чинчийии уонна Хотугу аҕыйах ахсааннаах омуктар проблемаларын институтун археология уонна этнография салаата «Харысхал биһиги олохпутугар» диэн научнай-практическай семинары бүтүн республика олохтоохторугар ыытар. Бу семинар сүрүн сыалынан билиҥҥи олоххо саха омук төрүт култуурата сүппэккэ, аныгы сайдыы сабыдыалыгар оҕустаран аһара уларыйбакка-тэлэрийбэккэ кэлэр кэнчээри ыччакка тиийэрин ситиһии буолар. Семинарга араас сылларга этнографиянан, фольклорунан, кыраайы үөрэтиинэн дьарыктанар дьон, норуот маастардара, култуура эйгэтин үлэһиттэрэ кыттан сиэр-туом сөпкө туттуллуутун, итэҕэл былыргы суолтатын уонна аныгы олоххо хайдах туттуохха сөбүн туһунан араас сүбэни-аманы, маастар-кылаастары биэрэллэр. Институттан сүрүн экспертарынан ист.наука дуоктара, профессор Р.И. Бравина, ист.наука кандидаттара Н.К. Данилова уонна В.Е. Васильев сылын аайы кытталлар.
Быйыл, муус устар 24 күнүгэр буолбут семинарга саха күннээҕи олоҕор бэйэни көрүнүүтүгэр, аһылыгар, таҥнан-саптан сылдьыытыгар, бэйэтин салайыныытыгар, өбүгэттэн кэлбит идэлэригэр, дьарыктарыгар харыстанар ньымаларын туһунан кэпсэтии буолла. Онно кыттыыны ыллылар:
– Историческай наука дуоктара, профессор Розалия Иннокентьевна Бравина,
– Историческай наука кандидата Наталия Ксенофонтовна Данилова,
– Историческай наука кандидата Валерий Егорович Васильев
– Дьокуускайдааҕы «Арчы Дьиэтэ» духуобунай култуура киинин салайааччыта Валентина Ивановна Бочонина;
– Алгысчыт Иван Герасимович Васильев – Алгыс Уйбаан
– Алгысчыт, сиэри-туому тарҕатааччы Александр Григорьев – Саалтааны;
– СӨ норуотун маастара Шишигина Татьяна Николаевна
-Реставратор – худуоһунньук Василий Егорович Протоппопов
– Саха чэйин култууратын тарҕатааччы Туйаара Степановна Григорьева – Кучу Туйаара
– СӨ култууратын туйгуна, норуот талааннааҕа Евдокия Ивановна Павлова – Далбар Кылыһах
– Дьокуускайдааҕы «Арчы Дьиэтэ» духуобунай култуура киинин методиһа Анна Андреевна Холмогорова
– Психолог, өбүгэ үгэһин уһуйааччыта, туомньут Анисия Петровна Старостина –Сайыы Кута
– Арчыһыттар, «Тирэх билии» бэйэни салайыныы үөрэҕин ыытааччылар Байдам, Сыдьаайа Филипповтар
-Уус, харысхаллары оҥорооччу Эдуард Кривошапкин. Маны таһынан АГИКИ 1 кууруһун устудьуоннара Александра Максимова уонна Клаудия Колесова кыттыыны ыллылар.
Быйылгы семинар формата уруккулартан уратыта диэн куйаар ситиминэн кытта ыытылынна. Онон, билиҥҥи хааччахтаах кэмҥэ бэрт сэргэх тэрээһин буолбутун, кыттыбыт дьон бэлиэтээтилэр.
Информацияны Н.К. Данилова бэлэмнээтэ
(Д. Чахова уонна В. Новоприезжай хаартыскалара)
